Аркан тартыш – бул күч сынашуу түрү, анда эки топ атаандаш бири-бирине каршы мелдешет. Аркан тартыш дүйнөнүн көптөгөн элдерине таандык салттуу оюн болуп, ал элдик майрамдарда жана салтанаттарда өткөрүлүп келген.

Аркан тартыш боюнча мелдешкен спортчулар жалпы күчтүн жогорку деңгээлине, күчкө туруктуулукка, «жарылуучу күчкө», ошондой эле жакшы координацияга, ритмди жана убакытты сезүү жөндөмүнө, психологиялык туруктуулукка, жогорку мотивацияга жана бардык физикалык жана руханий күчтөрдү топтой билүүгө ээ болушу керек.

Мелдешке ар бир командадан сегизден катышуучу катышат. Спортчулардын максаты — арканды белгиленген аралыкка өз тарабына тартып өтүү же атаандаш команданы эрежени бузууга мажбур кылуу. Жеңишке жетүү үчүн арканды эки жолу өз тарабына тартып өтүү зарыл.