Биримдик Кербени
Биримдик Кербени
Өткөн менен келечекти байланыштырган салт
«Биримдик Кербени» — бул жөн гана жүрүш эмес. Бул Дүйнөлүк көчмөндөр оюндарынын ачылышын утурлай өткөрүлүүчү ырымдык сапар. Ал аймактарды, элди жана маанилерди бириктирип, кыймылды маданий мурастын уландысынын жана тамырга болгон урматтын символуна айландырат.
Ыйык символ — Суу
Дүйнөлүк көчмөндөр оюндары негизделген күндөн тартып анын ыйык символу болуп Борбор Азиядагы эң касиеттүү жерлердин бири болгон Хан-Теңир мөңгүлөрүнөн алынган суу эсептелет. Ал башталышты, кыймылды, тазалыкты жана жашоону символдоштурат. Оюндардын башталышына чейин бул суу куюлган көөкөрлөр уюштуруучу өлкөгө жеткирилет. Ал жерде Хан-Теңирден алынган суу башка аймактардын булак суулары менен бириктирилет.
Миссиясы бар жүрүш
Ачылыш аземинин алдында Кыргызстанда жана Оюндарды өткөрүүчү өлкөдө суу чогултуу аземдери өткөрүлөт. Борбордук аянттардагы узатуу аземинен кийин кербендер ДКО-2026 өтүүчү жайга жол тартышат. Курамында аксакалдар, спортчулар, артисттер, ыктыярчылар, элчилер жана делегациялар болот. Алар суу куюлган идиштерди гана эмес, маданияттын символдорун — боз үйлөрдү, музыкалык аспаптарды, улуттук кийимдерди жана тиричилик буюмдарын да алып жүрүшөт. Бул «Көчмөндөр ааламы» этномейкиндигинин келечектеги көрүнүшүн калыптандырат.
Биримдик аземи
Эң маанилүү учур — Ачылыш аземи. Өлкөнүн бардык аймактарынан келген өкүлдөр көөкөрдөгү сууну башкы сахнага алып келишет. Суулардын биригиши — элдин биримдигин, ата-бабаларга болгон урматты жана жалпы келечекке умтулуусун символдоштурат.
